Lanuztera deitu dute Navalen

Naval ontziolako enpresa batzordeak lanuztera deitu ditu langileak. Asteburuetarako egin du deia. Haren arabera, enpresa langileei eskatzen ari zaie ordu osagarriak egiteko, eta, bitartean, lan erregulazioa aurkeztu nahi du. "Ez da logikoa lan erregulazioa mahai gainean jartzea, langileak ordu osagarriak egiten ari direnean".

Datorren asteburuan hasiko dira greban, eta hilabete emango dute asteburuetan lanik egin gabe. Ordea, iragarri dute mobilizazio gehiago egingo dituztela egoera ez bada aldatzen. Langile batzordeak bilera eskatu die Eusko Jaurlaritzari, Bizkaiko Diputazioari, Sepi elkarteari eta Sestaoko Udalari. Naval ontziolaren benetako egoeraren berri jakin nahi du hala langile batzordeak.