Euskal enpresak ez dira bereziki baikorrak hurrengo urtearen hasierari dagokionez, ez behintzat Laboral Kutxak eginiko azterketan parte hartu dutenak. Izan ere, gehiago dira 2024aren hasieran okerrera egingo dutela uste dutenak hobera egiteko esperantza dutenak baino. Lautik batek (%25,2) uste du hurrengo hiruhilekoko fakturazioa oraingoa baino okerragoa izango dela; aldiz, %18,9k uste dute hobea izango dela. Besteek –%55,9k, hain zuzen– uste dute antzekoa izango dela.
Inkestaren ondorioei erreparatuta, ekonomia hoztea espero dute enpresek, oso gutxi baitira hobera egingo duela iritzi diotenak. Ekonomiaren egoera orokorrari buruz galdetuta, %7,7k uste dute hobera egingo duela urte hasieran; besteek, aldiz, uste dute antzera eutsiko diola (%46,6) edo okertu (%45,5) egingo duela.
%81,5Langile kopuruari eutsiko dio Inkestaren emaitza gehienak ezkorrak izan arren, enpresen %81,5ek ez dute espero kaleratzerik. Hau da, uste dute egungo langile kopuruari eutsiko diotela. Bestalde, %12 dira lantaldea murriztu beharko dutela uste dutenak.
Haien jardun ekonomikoaren eta eskaeren bilakaeraren inguruko iritzia antzekoak dira. Jardunari dagokionez, %9,9k uste dute gora egingo duela urte hasieran; hiru aldiz gehiago dira, ordea, okerrera egitea espero dutenak (%30,9). Eskaeren datuek bat etorri behar zuten ezinbestean aurreikuspen horiekin: %16,2k uste dute eskariak ugaritu egingo direla, eta %24,8k murriztuko direla.
Enplegua, egonkor
Laboral Kutxaren inkestan, lantaldearen bilakaeraren inguruan ere galdetu diete enpresei, eta enpresa gehien-gehienek iritzi diote berdin eutsiko diotela hurrengo hiruhilekoan (%81,5). Hamarretik batek pentsatzen du langile gutxiago beharko dituela (%12,6), eta %5,9k uste dute lantaldea handitu egin beharko dutela.
Azterketak beste hainbat gairi buruzko iritziak biltzen ditu, eta deigarria da, esaterako, %17,2k bakarrik jaso izana Europako Funtsetako diru kopururen bat, eta %83,8k salmentekin jasotako diru sarreren %1 baino gutxiago baliatu du berrikuntzarako eta garapenerako.
