Hegaluzearekin arazo ugari izan eta gero —Bizkaiko golkoan gutxi sartu delako—, Espainiako Gobernuak euskal arrantzaleak aztoratu zituen, irailean berriro antxoaren kostera zabalduz —arrantzale galiziarren eskaera aintzat hartuta—. Ontzi batzuk, hegaluzea utzi, eta antxoatara abiatu ziren, nahiz eta Madrilen erabakiarekin ados egon ez. Baina sardina topatu zuten aurrena, eta antxoa ez baina sardina arrantzatu zuten azkenean. Eta orain, berriz, sardina bukatu da; ez itsasoan ez delako, Madrilen arabera, kuota amaitu delako baizik.
2014. urtea irregularra izango da oso euskal arrantzaleentzat. Gehienak hegaluzeetara joan dira, nahiz eta hura urruti egon, oraindik zehaztu ez dituzten arazoak direla medio, arrain mota hori Bizkaiko golkotik urrun dagoelako aurten. Espainiako Gobernuak askoren harrigarri antxoaren kostera berriro zabaldu ondoren (3.000 tonako mugarekin), zalantzak sortu dira han eta hemen. Itxura batean, batzuk badira antxoetara joan direnak, baina emaitzarik gabe. Sardinak salbatu du orain arte haien saio antzua, baina aurrerantzean horrek ez du balioko, debekua indarrean sartuko baita gauerdian.
