Merkealdiaren ondorioz, prezioak %0,3 jaitsi dira otsailean Hegoaldean

Urtarrilean hasi eta otsailean jarraitu egiten du merkealdiak, deskontu handiagoekin. Arropa eta oinetakoen prezioen jaitsiera horrek eragin du otsaileko KPI kontsumo prezioen indizea negatiboa izatea. INEk emandako datuen arabera, batez beste, %0,3 merkatu dira oinarrizko produktuak Araban, Bizkaian, Gipuzkoan eta Nafarroan. Inflazioa %0,7an dago.

Lau probintzietan jaitsi dira salneurriak otsailean; gehien, ordea, Bizkaian: %0,4. Nafarroan %0,3 merkatu dira, eta Araban eta Gipuzkoan, %0,2. Merkealdiaren eragina urte hasieratik hona pilatutako inflazioan ere igartzen da. 2010eko lehen bi hilabeteetan %1,5 merkatu dira prezioak.Nolanahi ere, aurtengo eta iazko otsaileko datuak konparatuz gero, guztietan garestitu dira salneurriak: %0,8 Bizkaian eta Araban, %0,7 Gipuzkoan eta %0,6 Nafarroan.

Produktuka, arropa eta oinetakoez gain, elikagaiak eta alkoholik gabeko edariak eta aisialdia eta kultura ere merkatu dira. Gehien garestitu diren gauzen artean, edari alkoholdunak eta tabakoa daude, %1,5 urtarriletik otsailera bitartean. Aipagarria da urtebetean tabakoak izandako gorakada. Iazko otsailean baino %17,6 gehiago balio du.

UGTren eskaera

KPIaren datuen berri izan ostean,soldatetan erosteko ahalmena bermatu behar dela esan du Maribel Ballesteros UGT-Euskadiko ekintza sindikaleko arduradunak. Haren arabera, beharrezkoa da langileei konfiantza sorraraztea, horrek bultzatzen dituelako kontsumitzera. Gaineratu du kontsumo horrek laguntzen diela enpresen inbertsioei eta lanpostuen sorrerari.

Zenbakia

%17,6

Tabakoa. INEk emandako datuen arabera, urtebetean %17,6 garestitu da tabakoaren salneurria Hego Euskal Herrian. Urtarriletik otsailera bitartean ere gora egin du.