LABek gaur goizean azaldu duenez, lau hilabete eskas falta dira EAEn metaleko hitzarmenak desagertzeko, eta, "blokeo" egoera horri aurre egiteko, beharrezkotzat jo dituzte ekimen berriak.
Sindikatuak adierazi du sinadura bilketaren atxikimendua "sendoa" baldin bada —horretaz "ziur" daude— sindikatu guztien erantzukizuna izango dela patronalari "erritmoak markatuko dizkioten mobilizazio indartsuak" proposatzea.
Apirilaren hasiera arteko epea jarri dute bilketarako. Ondoren, LABek egindako lanaren balorazioa egingo du, eta hitzarmenarekiko benetako atxikimenduari erantzungo dion mobilizazio planteamendu bat proposatuko du. LABen datuen arabera, hitzarmen horren menpe 100.000 langiletik gora daude.
Gogorarazi du sektoreko hitzarmenaren alde egin duela beti: "LABek ez du egiten toki batean sektore hitzarmena ontzat eman eta beste batean ez".
