Pentsiodunen plataformak deituta manifestazioak egin dituzte Bilbon eta Donostian, eta mobilizazio jendetsuak izan dira bi hiriburuetan. Gasteizen eta Iruñean, berriz, arratsaldean egingo dituzte manifestazioak. Gasteizen, Artiumetik abiatuko dira, 19:00etan hasita. Iruñean, berriz, Espainiako Gobernu Ordezkaritzaren parean elkartuko dira, 19:30etan.
Bilboko manifestazioa eguerdian ateratzekoa zen manifestazioa udaletxetik, baina milaka ziren ordurako han zeuden lagunak, eta ia ordu erdi beranduago abiatu dute bidea. Pentsio publiko duinak. %025a ez zuen pankartaren atzean abiatu dira Espainiako Gobernuak Bilbon duen delegaziora. Kostata egin du aurrera manifestazio buruak. Ordurako, milaka ziren manifestazioaren bidean zain zeuden pentsionistak. Antolatzaileen arabera, 25.000 pertsona bildu dira Bilboko kaleetan.
Milaka pentsionistek Bilboko kaleak hartu dituzte. Manifestazioa burua kostata atera da udaletxetik @berriapic.twitter.com/lvjrqDUkb2
— Asier Arrate (@AsierArrate) 2018(e)ko otsailak 22
Herrietatik ere hiriburuetarako bidea hartu dute hainbat erretiratuk, gaurko antolatutako manifestazioetan parte hartzeko. Izan ere, haserre daude, Espainiako Gobernuak %0,25eko gutxieneko igoera besterik ez baitie aplikatu aurten ere. Plaza Biribileraino egin dute bidea, eta ibilbide osoan joan zaie jendea batzen. "Lapurrak eta ustelak erakundeetatik kanpo", "pentsionistak aurrera" eta "ez da dirua falta, lapurrak daude soberan" leloak errepikatu dituzte Moyua Plazarako bidean.
Foru Aldundiaren aurrean da manifestazio burua eta oraindik jendea falta da manifestaziora gehitzeko @berriapic.twitter.com/DLtLArDaui
— Asier Arrate (@AsierArrate) 2018(e)ko otsailak 22
Moyua plazan bukatu da manifestazioa eta, bertan irakurritako agirian gogor egin dute Espainiako Gobernuaren kontra. Bizkaiko pentsionisten plataformek egindako adierazpen bateratuan, salatu dute "lapurreta" dela, eta askok hilaren amaierara iristeko arazoak dituztela azpimarratu dute. "Hemen gaude gure nazka eta nekea adierazteko. Adarra jotzen digute, eta irainduak sentitzen gara pentsioak %0,25 igoko dituztela esaten digutenean".
Fatima Bañez ministroari ere zuzendu dira "Gezurretan dabil esaten digunean, pentsioak bere horretan mantendu daitezen ezin dituztela gehiago igo". Salatu dute, Espainiako Gobernuak aspaldi abiatu zuela pentsio publikoen aurkako erasoa, eta erreforma horiekin "azken kolpea" eman nahi diotela pentsio sistemari. "Kendu mozorroa eta onartu ezazue behingoz, zuen asmoa segurtasun soziala eta pentsioak pribatizatzea dela". Manifestazioa bukatzeko, Espainiako Lan ministroak bidalitako gutunak bueltatu dituzte Espainiako Gobernuaren delegazioan. Antolatzaileek deia luzatu diete gerturatutakoei, astelehenero udaletxeen aurrean egiten dituzten elkarretaratzeetan parte hartzeko.
Pentsiodunen eskariekin bat egin dute zenbait ordezkari politikok. Arnaldo Otegi EH Bilduko koordinatzaile nagusiak erabakitzeko eskubidearekin lotu du pentsio duinen eskaria. Pentsioak nork kudeatzen dituen erabakitzeko aukera galdegin du Otegik: "Gizarte Segurantzaren eltzeitsua ostu dutenak ala geuk".
Pentsiodunekin batera Bilboko kaleetan egon gara; pentsio duinak bermatuko dituen pentsio sistema aldarrikatzeko. pic.twitter.com/IMuZrBOtfL
— Arnaldo Otegi (@ArnaldoOtegi) 2018(e)ko otsailak 22
Ernai gazte erakundea belaunaldien arteko elkarlanaren alde agertu da, pentsio publiko duinak bermatze aldera. Gazteen etorkizuna orain borrokatu behar dela ohartarazi du.
"Euskal gazteria aurrera!" oihukatu dute pentsio duinen defentsan kaleak hartu dituzten milaka herritarrek. Etorkizuna eraikitzeko, oraina borrokatzea dagokigu. Gazteok lehen lerroan! #PentsioPublikoDuinak#PentsionistakBorrokanpic.twitter.com/RODZ2ugey3
— Ernai (@ernaigazte) 2018(e)ko otsailak 22
Bilbon, bezala, Donostian ere milaka lagun elkartu dira manifestazioan; 5.000, antolatzaileen esanetan. Agijupens Gipuzkoako Pentsiodun eta Erretiratuen elkarteak deituta, Amarako autobus geltoki zaharretik Espainiako Gobernu Ordezkaritzaren egoitzara arteko bidea egin dute, Pio XII plaza inguratuz. Gobernu espainiarraren ordezkariari haien eskariak biltzen dituen eskutitza eman diote elkarteko ordezkariek.
Manifestazioaren burua helmugara iritsi denean, jende multzoaren atzealdea geltoki zaharrean zen oraindik.
Donostian jende ugari elkartu da pentsioa duinen alde. pic.twitter.com/9QQMl39fUc
— Berria.eus (@berria) 2018(e)ko otsailak 22
Pentsiodunen elkarteak haserrea adierazi du pentsioen %0,25eko igoerarengatik, eta hauteskundeetan pentsioen "aurka" egiten duten politikariak zigortzera deitu du. "Pentsio gehiago, ustelkeria gutxiago", "hemen bizi hemen erabaki" eta "murrizketarik ez" oihukatu dute manifestariek. Gutxieneko pentsio duin bat ere galdegin dute: 1.080 eurokoa.
