Indar erakustaldia eta indarkeria batu ziren atzo lan erreformaren aurkako protesta egunean. Aurreko egunetan baino jende gehiago batu zen manifestazioetara eta blokeatze ekintzetara, eta erakutsi zuten hainbat astez iraun duten protesta mugimenduak ez duela oraindik eman azken hatsa. Parisko manifestazioan bortizkeria irudi gogorrak ikusi ziren manifestari taldeen eta polizien artean; gutxienez 26 lagunek zauriak jasan zituzten, eta hamabost lagun atxilotu zituzten.
Protesta eguna «erraldoia» izatea nahi zuten CGTk eta lan legea bertan behera geratzeko eskatzen duten beste sindikatuek eta mugimenduek. Hori lortu nahian, indarrak Parisen biltzea erabaki zuten, baita lortu ere, hamarnaka mila manifestari bildu zirelako Italie eta Invalides plazen arteko bost kilometroko ibilbidean. Milioi bat lagun bildu zirela aipatu zuten antolatzaileek; 75.000-80.000 zirela ziurtatu zuen Poliziak.
Manifestazioaren zati batek, arduradun sindikalak buru zituenak, arazo handirik gabe egin zuen aurrera, baina beste zati batzuetan borroka gogorrak gertatu ziren polizien eta manifestarien artean. Parisko prefeturak «istiluak eragiteko asmoa zuten ehunka kaputxadun» zeudela ziurtatu zuen, eta haiei egotzi zien istiluak hastearen eta hainbat saltokitan txikizioak eragitearen ardura. Polizien indarkeria salatu zuten, aldiz, manifestari batzuek. Ura botatzen duen kanoia eta negar gasa erabili zituzten segurtasun indarrek, eta hainbat oldarraldi egin zituzten.
Blokeatzea ordainlekuan
Ipar Euskal Herrian ere ez da itzali lan erreformaren aurkako protesta, Parisen baino giro bareagoan gertatzen ari da bada ere. Lan legearen aurkako kolektiboak deituta, goizean goiz ehun bat grebalari elkartu ziren A63 autobideko Miarritzeko ordainlekuan, Hendaiarako noranzkoan. Pankarta eta egurrezko paletekin, zirkulazioa itxi zuten, eta hamabi kilometroko ilarak eragin zituzten; inguruko errepideetan ere zirkulazio arazo handiak eragin zituzten.
[Youtube]https://youtu.be/6_FTmw9afu8[/Youtube]
«Lan legearen kontra, bloka bloka, blokatu!» oihuen artean, kamioi ilara luzea osatu zen; anartean, partikularren autoak doain pasatzen utzi zituzten, grebalarien kutxarentzat borondatezko sari bat ematea proposatu. Pozik hartu zuten ekintza auto-gidari anitzek, manifestarien aitzinean tutaka eta txaloka pasatuz batzuen kasuan, baita txanpon zenbait eskainiz ere. «Ezkerrekoa omen da gobernua, baina langileak izorratu besterik ez du egiten. Zuen alde nago, erabat», zioen moto gidari batek.
Frantziako sindikatuak negoziazioak aipatzen ari badira ere, lan legearen kontrako Euskal Herriko kolektiboko kideek argi dute lege proiektua osoki kendu behar dela. «Gure lema argi da hasieratik, legea osoki kentzeko eskatzen dugu; ez da aldaketa edo zuzenketa posiblerik; kendu eta kitto!», adierazi zuen Dominika Dagerre kolektiboko kideak. «Lan legea, bere oinarrian berean, langileen kontrako eraso izugarria da, XX. mendean lortutako oinarrizko eskubideak zalantzan jartzen baititu». Dagerren arabera, Paristik sindikatuek erraten dutena eta «baseetan gertatzen dena» bereizi behar dira: «Bada komunikazio joko bat, mugimendua bukatua dela errateko, baina bada asteak hola dela. Ikusten duguna da egunez egun mugimenduak segitzen duela, borrokak segitzen duela, eta populazioaren gehiengoak ez duela nahi lege hori».
Aitor Servier Aitzinako bozeramailearen hitzetan, lan legeak gazteria prekaritatera kondenatuko du. Pozik agertu zen, goizeko ekintzan gazte andanak parte hartu duelako: «Lan legearen kontrako kolektiboan parte hartuz, gu bereziki saiatu gara gazteria aktibatzen. Lan legearen ondorioak zein izanen diren aztertu dugu, kontzientziak pizteko, eta ikusi dugu, gaur bezala, gazte anitzek parte hartu duela mobilizazioetan».
Blokeatzea 14:00etan eten zuten grebalariek. Aurretik, hamaiketatik aurrera, 2.000 pertsona inguru elkartu ziren Baionako karriketan igaro manifestazioan, aurreko mobilizazioetan baino gehiago.
