ELA sindikatuak salatu du Adegi bere horretan jarraitzen duela, "lan erreforma aplikatzeko erabakiarekin eta Gipuzkoako metalgintzako ituna hiltzat emanez". Adegik "argi eta garbi" esan du zer-nolako lan merkatua nahi duen metalgintzan. "Lan merkatu desarautua nahi du", dio sindikatuak, enpresariek "nahierara" ezar ditzan lan baldintzak.
Horiek horrela, Adolfo Muñoz buru duen sindikatuak dio ez direla ezer egin gabe geratuko erakundeek eta epaitegiek zer esaten duten zain. Langileen eskubideak "bermatzeko bide gehiago" daudela uste du sindikatuak, kasurako mobilizazioa.
Hain zuzen, urriaren 21etik 25era, "mobilizazio eta borroka aste bat" antolatuko du Euskal Herri osoan eta sektore guztietarako. Aste hori indarrean dauden lan gatazka askorentzat mugarria izango dela dio ELAk. Besteak beste, hainbat lekutan lanuzteak egitea espero du sindikatuak.
