Mondragoneko Kontseilu Orokorreko kideek datozen orduetan erabakiko dute hiru milioi eurorekin laguntzen duen ala ez Fagor Etxetresnen Confort adarrerako Edesako bazkide talde batek garatutako bideragarritasun plana. Behin betiko erantzuna dagoenean eragile guztiei jakinaraziko die, baita hedabideei ere. Ezusterik ez bada, ezezkoa izango da erantzun hori, nahiz eta Edesa-Geyser lantegiak lotzen dituen proiektuak aukera txikiren bat izan oraindik.
Plana garatu duen talde eragileak proiektua erretiratu duela jakinarazi zien atzo Edesako bazkideei Basaurin egindako batzarrean. "Plana erortzen utzi dute", esan zieten Mondragoni erreferentzia eginez. "Ez dute garaiz erantzun, eta ez erantzutea ezetz erantzutea da", azaldu zuten. Jakin bazekiten, ordea, gaur bertan Kontseilu Orokorrak bilera egingo zuela auzia argitzeko, eta pentsatzekoa da aste honetan bertan Mondragon ezezkoaren alde egitekotan dagoela jakin duela taldearen gidarien ahotik.
Erantzuna azaltzeko oinarriak
Haatik, Arrasaten ez dute oraindik azken hitza esan, eta horrek azalduko luke hein batean atzo Edesan zabaldu zuten mezua; gaur arratsaldeko goi bileraren bezperan presioa egiteko modu bat litzateke, jakinda proiektuak apenas duela aukerarik. Mondragonek luze-zabal aztertu ditu Basauriko taldeak igorritako planaren zenbaki guztiak, eta beste iritzi kualifikatu bat ere eskatu du. PwC ikuskaritza enpresak IBR (Independent Business Review) azterketa bat egin du plan horrek dituen benetako aukerak zehazteko.
Mondragonek ezezkoa emango balu azkenean, azterketen emaitzak behar bezain onak ez diren seinale litzateke, ez behintzat inbertsioa gutxieneko segurtasun batez egiteko adinakoak. Arrasatek ondo daki Bizkaiko eta Gipuzkoako diputazioak, Eusko Jaurlaritza, Eusko Legebiltzarra eta proiektu horretan enplegu zuzena lortuko luketen 260 langileak (zeharka beste 85) begira-begira daudela. Arrasatek 20 milioi euro eskatzen dituen planean hiru ez inbertitzea erabakitzen badu, oinarri sendoak behar ditu ezezko hori azaltzeko, hala talde barrura begira nola gizarteari begira.
