Maiatzaren Lehenari begira ELAk antolatutako ekitaldien berri emateko agerraldia egin zuen atzo sindikatuko buruzagiak, Amaia Muñoa idazkari nagusiaren albokoarekin batera. Esan zutenez, ostiralekoa greba orokorrari begira «motorrak berotzeko eguna» izango da. Gizartea «demokratikoki astindu» nahi dutela azaldu zuen Muñozek, patronalak eta gobernuek «haien kabuz eta beste inork ezer esan gabe krisia kudeatzeko desira antidemokratikoaren» aurrean.
Enpresaburuek gobernuei egiten dieten «xantaia» salatu zuen ELAko buruak: «Krisi honetara eraman gaituzten neurrietan sakontzera behartu nahi dituzte». Langileen eta lan baldintzen aurkako «erasoak» ere gaitzetsi zituen, «soldatak murriztu eta malgutasun neurriak eskatzen dituzte, krisia langileek ordain dezaten». Neurri horiekin, alabaina, «enplegu duina lan prekarioarekin ordezkatu» baina lanpostu berririk ez dela sortuko ziurtatu zuen Muñozek.
Hego Euskal Herriko administrazioei buruz, bestetik, hamabost urtean hazkunde ekonomikoa eman den arren, «Europako gastu sozialik baxuena izaten jarraitzen» dutela salatu zuen. Horren harira, urteotan «espekulazioan aritu direnak zigortzeko» zerga politika egiteko prest dagoen gobernurik ez egotea deitoratu zuen.
Aldarrikapena eta ospakizuna
Aurtengo Maiatzaren Lehena «testuinguru berezian» datorrela azaldu zuen Amaia Muñoak. Krisia dela eta, langileen aurkako erasoak salatu eta aldarrikapenerako eguna izango dela esan zuen. Era berean, maiatzaren 21eko greba orokorrari begira, kalera ateratzeari oso garrantzitsua iritzi zion idazkari nagusiaren albokoak, «aurretiko prestaera» gisa.
ELAk Bilboko Jesusen Bihotza plazan egingo du hitzaldi nagusia, 11:30ean. Bertan, Adolfo Muñozek eta Patxi Agirrezabalak hartuko dute parte. Ondoren, manifestazioa egingo dute Plaza Biribileraino. Aldarrikapenak ez ezik, ospakizunak ere lekua izango duela esan zuen Muñoak. Horregatik, urteroko bazkaria egingo dute Barakaldoko BEC erakustazokan, 14:30etik aurrera. Bertan, 5.000 lagun baino gehiago bilduko dituzte.
