Aparteko sari bat kentzea Nafarroaren eskuduntzen aurka doala dio Parlamentuko zerbitzu juridikoen txosten batek, eta hori oinarri hartuta helegitea "Nafarroa leialtasunez baina irmotasunez" defendatzeko modua dela ziurtatu du Juan Jose Lizarbe PSNko parlamentariak. Lan erreformak, berriz, ez ditu Nafarroaren konpetentziak ukitzen, baina Konstituzionalera eramatea erabaki dute, Patxi Zabaletaren hitzetan, "langileen baldintzak hondatzen" dituelako.
UPN abstenitu egin da Gabonetako sariari buruzko helegitean, eta lan erreformari buruzkoan aurkakoa eman du. Bi helegiteen kontra mintzatu da PP.
Nafarroako Gobernuak onartu egin du aurten Gabonetako saria ez ematea bere langileei, baina trikimailu baten bidez neurriari iskin egitea proposatu du: hurrengo urteotan udako aparteko saria urtarrilean pagatzea, eta abendukoa, berriz, uztailean.
