Batez beste, 1.973 euroko (+%1,5) soldata gordina jasotzen dute hilean Gipuzkoako, Bizkaiko eta Arabako beharginek, eta 1.824 eurokoa (+%1,7) Nafarroakoek. Zenbakiak gehitu egin dira iaztik, eta, Nafarroako kasuan, estatistika horiek jasotzen direnetik inoiz erregistratu den kopururik handiena da.
Adecco Group institutuak argitaratu ditu datuak, eta lan baldintzekin lotutako beste zenbait aldagai ere kontuan hartu ditu txostenean. EAEn soldata handitu den arren, deigarria da 251 puntu jaitsi dela batez besteko soldataren erosahalmena, 2017ko datuekin alderatuz gero. Nafarroan, berriz, 199 puntu handitu da gaitasun hori.
Langabezia kontuetan, Europako datuekin alderatuta, deigarria da EAEn lanik gabe daudenetatik %40,6 bi urtean baino gehiagoan daudela hala, Europako Batasuneko batezbestekoa %26,4 baita.
Lan istripuak goraka ari dira oraindik ere, Nafarroan nagusiki. Joan den urtean baino %11,5 gehiago erregistratu dira aurten (83,8 istripu 10.000 langileko), eta, 2013arekin konparatuta, %51 gehiago izan dira. EAEn behera egin dute azken urtean (%4,2 gutxiago), baina 2013an baino %9 gehiago kasu horretan ere.
Lan istripuen bide beretik doaz grebak ere. Nafarroan, ia bikoiztu egin dira lan gatazkak (%99 gehiago iaz baino), eta 100.000 enpresako 102,1 gatazka izan dira; zenbaki hori 98,4 da EAEn (+%22,8). Halere, azpimarratzekoa da greba kopurua nabarmen handituagatik asko txikitu dela greba egin duten langileen kopurua ere: Gipuzkoan, Bizkaian eta Araban iaz baino %38,8 langile gutxiagok egin dituzte geldialdiak.
