Sestaoko lantokirako lan karga eskatu dute Navaleko beharginek gaur goizean Eusko Jaurlaritzak Bilbon duen egoitzaren aurrean. Orain egiten ari diren ontzia martxoan amaitzea aurreikusi dute, eta geroko ez daukate beste ontzirik egiteko eskaririk. Jaurlaritzari eskaera egin diote lan karga lortzeko saia dadin, modu horretan ontziolaren etorkizuna bermatu ahal izango baitute.
Beste ontziola batzuetan, berriz, ontziak egiteko kontratuak sinatzen ari dira, baina Sestaoko ontziolan egiten dituztenak baino txikiagoak, Jose Pedro Gonzalez langile batzordeko presidenteak gogorarazi duenez. Navalekoak ere halako ontziak egiteko prest daude, “edozelango ontziak egiteko gai” direlako. Horregatik, galdera egin du: “Beste ontzioletan lan karga baldin badaukate, ez dugu ulertzen zergatik guregana ez den ezer etortzen”. Akziodun eta erakundeen babesa eskatu dute, eta mobilizazioetara joko dutela iragarri.
