Komenigarria litzateke, Espainiako enpresariek kontratazioak areagotuko dituztelako hitza emango balute, langileen soldatak %10 murriztea. Hala uste du Nazioarteko Diru Funtsak, eta halaxe jakinarazi dio Espainiako Gobernuari. Beste proposamen batzuk ere egin ditu, hala nola enpresek Gizarte Segurantzari egin beharreko kotizazioak murriztea, eta neurri hori onartu eta bi urtera BEZa igotzea, soldata txikiagoek erosahalmenean hain gogor jo ez dezaten. Horrelako neurrien bitartez, %3ko defizit mugarekin 2018. urtean betetzeko aukerak areagotuko lituzke Espainiak, diru erakundearen arabera.
Funtsak egindako azterketan, langabeziaren datu gogor bat islatu dute: 2019. urtera arte, langabezia tasa %25etik gorakoa izango da Espainian. Beharrezkotzat jotzen du Espainiako barne malgutasuna areagotzea, lan kontratu motak gutxitzea eta martxan dauden lan politikak hobetzea. Horretarako, negoziazio kolektiboaren erreforma sakona egitea proposatu du. Hortaz, soldatak %10 murriztuz, Gizarte Segurantzari egin beharreko ordainketak %1,7 gutxituz eta BEZa handituz, BPGaren igoera %5 izango litzateke 2016. urterako; langabezia tasak %6 eta %7 bitarte jaitsiko litzatekeela kalkulatu du, halaber, Nazioarteko Diru Funtsak.
Lagarderen erakundeak gaineratu du Espainiako politika aldatuko ez balitz 2018. urtera arte atzeratuko litzatekeela BPGaren hazkundea.
