NDFk Eurogunearen suspertzea «apala» izango dela uste du

Azkenaldian askotan hitz egin da kimu berdeei buruz, baina Nazioarteko Diru Funtsak (NDF)«behin-behinekoak» izan direla uste du. Hala, orain artean esandakoa berretsiz, ez da datorren urtera arte ekonomia zulotik ateratzen hasiko. Eta orduan eresusperraldia «apala» eta «zalantza ugariduna» izango dela iragarri du.

Uztailaren 8an eginiko aurreikuspenak berretsi zituen atzoko txostenean. Horien arabera, aurten Euroguneko ekonomiak %4,8 egingo du atzera, eta datorren urtean %0,3. Langabeziak, berriz, %10eko maila gaindituko du, eta %12ra iritsiko da datorren urtean. Bestalde inflazioa %0,2an geratuko da aurten, eta %0,7an, berriz, 2010ean.

Defizita ere asko handituko da bankuei emandako maileguak direla-eta: 2007an %0,6an baldin bazegoen, datorren urtean %6,9an egongo da.

Europako Banku Zentralak egindako lana ontzat jo du NDFek: batetik, likidezia eta kreditua sustatzeko garaian; eta bestetik, diru politikan egindako lanarengatik, interes tasak %1era jaitsiz. Aurrera begira ere, interes tasak maila horren bueltan mantentzeko gomendatu du.