Gehiegizkoa eta neurriz kanpokoa. Hitz horiek erabili ditu Iñigo Urkullu lehendakariak Europako Auzitegiak opor fiskalen auziagatik jarritako isuna definitzeko. "Arimarik gabeko Europa agerian utzi du: isuna jarri dute pentsatzen jarri gabe zeintzuk izan ziren arrazoiak eta laguntza horien jatorria".
"Babesgabetasun hirukoitza" pairatzen zuten enpresariek opor fiskalak ezarri zirenean, Urkulluren arabera: "Sekulako krisi ekonomikoa, orduko gobernuen industria politikarik eza eta ETAk enpresariei egiten zizkieten mehatxuak". Lehendakariaren arabera, laguntza haiek "egoera dramatikoa" bizi zuen herrialdea "suspertzeko" jarri ziren indarrean, eta ez enpresak euren ardura fiskaletatik salbuesteko.
Euskal Finantzen Kontseiluak isuna eta jarraitu beharreko prozedura "baloratu eta haztatu" beharko duela esan du Urkulluk, ordainketa nola banatu adosteko.
