Nahiz eta irailean Nafarroako Parlamentuak aurtengo aurrekontu proiektua baztertu, proposamen hartan ezarritako 3.384 milioi euroko gastu muga ezarri du 2013rako Nafarroako Gobernuak. "Oso gutxi" desberdintzen dira iraileko proiektutik, Lourdes Goikoetxea Nafarroako Gobernuko Ekonomia eta Ogasun kontseilariak azaldu zuenez.
Gaur eman du Goikoetxeak ildo ekonomikoen berri. Parlamentuak exekutiboaren proposamena baztertuta, 2012. urterako aurrekontuak luzatu behar zituen Yolanda Barcinaren gobernuak. Gastu muga, ordea, 3.384,49 milioi eurokoa izango da aurten. "Ezin dugu bestelako proposamenik egin", zehaztu du.
Gastuaren erdia (%49,80) Hezkuntza, Osasun eta Gizarte Gaietako departamentuetarako izango dela azaldu du Goikoetxeak. Iraileko proposamena oinarri hartu eta Barne Produktu Gordinaren %1,2ko beherakada aurreikusita, aurten murrizketarik ez egitea espero duela esan du.
