Joan den ostiralean, pentsioak eguneratzeko formula berriaren lege proiektua onartu zuenean, behin eta berriro galdetu zioten Cristobal Montoro Ogasun ministroari zenbatekoa izango zen 2014ko pentsioen igoera. Ez zuen erantzun. Gaur eman du erabakiaren berri. %0,25ekoa izango da igoera, erreformak onartzen duen mailarik apalena, beraz.
Orain artean, KPIa hartzen zen erreferentziatzat pentsioak berritzeko. Aurrerantzean, Gizarte Segurantzaren kontuen egoera, ekonomiaren bilakaera eta beste faktore batzuk kontuan hartzen dituen indize baten arabera berritu nahi ditu Espainiako Gobernuak. Indize horrek bi muga izango ditu: behetik, pentsioak gutxienez %0,25 igoko dira; goitik, gehienez ere KPIa gehi %0,25.
Erreformaren eraginez pentsioen erosteko ahalmena nabarmen murriztuko dela diote gizarte eragile guztiek.
