GMk gaur goizerako prentsaurrea deitu zuen atzo arratsaldean, Lewis Kaplan New Yorkeko epaileak salmentarako azken trabak altxa zituela jakin bezain pronto. Kaplanek ez zuen aintzat hartu GMren autoetan amiantoa erabiltzeagatik kaltetutakoek salmenta atzeratzeko egindako eskaera. Atzo ere bukatzen zen berregituratzearen aurka dauden taldeeiargudioak aurkezteko epea, baina Kaplanen erabakiaren ondoren, salmenta baimentzen zuen Robert Gerber Porrotetarako epailearen epaia indarrean jarri zen.
Fritz Henderson GMko buruzagiak gaur azalduko ditu GMC berriaren sorreraren nondik norakoak. GM zaharraren zatirik onenak jasoko ditu GMCk, eta txarrenek salgai jarraituko dute.
GMC markarekin batera, marka historikoak ekoitziko ditu konpainia berriak, hala nola Chevrolet, Cadillac eta Buick. AEBetako Gobernuak akzioen %60,8 izango ditu, enpresa sortzeko bideratuko dituen 50.000 milioi dolarren truke. Kanadako Gobernuak, berriz, 9.000 milioi dolar jarriko ditu enpresa berrian, eta haren %11,7ren jabe izango da. UAWk %17,5izango du, eta GMren hartzekodunek %10en jabe izango dira. Akzioen %25 arte erosteko aukera ere emango diete hartzekodunei.
General Motorsek milioika dolarreko zorrak ditu, eta ekainaren 1ean porrota iragarri zuen. AEBetan porrot egindako enpresa handiena bilakatu zen orduan. Detroiteko etxea AEBetako enpresa handiena izatera iritsi zen garai batean, eta XX. mendean estilo amerikarraren sortzaileetako bat izan zen; Cadillac, Chevrolet eta beste auto historiko batzuk ekoitzita ikur bat bihurtu zen.
AEBetako ikur bat
Konpainia erraldoiak, baina, ezin izan dio auto salmentak gogor jo dituen krisialdiaren enbatari eutsi, eta zuzendaritzak babestutako porrota iragarri zuen. Ordutik Gerber epaileak ikuskatzen du GMren kudeaketa. Errentagarriak diren konpainiaren zatiak GMCri saldu nahi dizkio zuzendaritzak, zorrak gainditzeko modu bakarra dela esanez. «Aldeak prest daude salmenta berehala egiteko», dio Fritz Henderson GMko presidenteak bere blogean. Gerber epailea ere irtenbide horren aldekoa da: «GMk ezin du iraun etengabeko galerekin eta likidotasunik gabe». GMren errentagarriak ez diren zatiak -hainbat fabrika zein auto dendak- bankarrotan jarraituko dute, saltzen dituzten arte.
General Motorseko hartzekodunek, jubilatuek eta GM autoekin istripuak izandakoek osatzen dute operazioaren aurkako taldeak. Konpainia berria sortzearekin batera euren eskubideak galduko dituztela uste dute, baita United Auto Workers (UAW) sindikatuko langileak gehiegi mesedetu dituztela ere.
