Urtea amaitzear, prezioen urte arteko hazkunde tasak behera egin du Hego Euskal Herrian, urriko %2,2tik azaroko %1,6ra. Beherakada horren oinarrian erregaien eta argindarraren prezioa jaitsi izana dago, joan den urtean handitu ziren baino gutxiago garestitu baitira.
Gutxiago garestitu diren erregaiek eragin zuzena izan dute garraio sektoreko prezioen hazkunde apalagoan. Hala ere, alor horretako salneurrien urte arteko hazkunde tasa %3 inguru izan da azaroan. Era berean, erregaiek zertxobait apaldu dute elikagaien prezioen garestitzea ere, %1eko tasaren ingurura. Berogailuetarako gasolioa eta argindarra ere iaz baino merkeago izateak moteldu egin dute etxebizitzako gastuen alorreko salneurrien igoera.
