Sindikatuek deituta, elkarretaratzea egin dute Gasteizko Correos plazan, Lan istripu gehiagorik ez. Prekaritatea hiltzailea lelopean. Deialdiarekin bat egin du langile batzordeak.
Ohar batean, LABek elkartasuna adierazi die hildakoaren gertukoei, eta prekaritateak langileen osasunean dituen ondorioak salatu ditu: "Osasuna galtzea eta lan istripuak ez dira lanaren ezaugarriak, lan eredu jakin baten emaitza ankerra baizik". CCOOk "onartezintzat" jo du lan istripuz hildako pertsona kopurua, eta "inplikazioa" eskatu die horrelakoak eragozteko ardura dutenei.
Igeltsero bat hil zen abuztuaren lehenean, Gasteizko Michelinen pneumatiko lantegiaren kanpoaldean. 57 urte zituen, eta azpikontratatuta jarduten zuen igeltsero lanetan. Osalan Laneko Segurtasun eta Osasunerako Erakundearen arabera, zapalduta hil zen behargina.
