Irizar Taldeko zuzendaritzak aldaketekin abiatu du urte ekonomiko berria irail honetan. Joan den igandetik, Rafael Sterling da autobusgintza kooperatibaren zuzendari nagusi berria. Orain arte taldeko negozioen nazioarteko zuzendari izan da Sterling; 44 urte ditu, eta telekomunikazioetako goi mailako ingeniaritza (EHU) eta MBA Executive (Deustuko Unibertsitatea) ikasketak ditu.
Albistearen berri emateko agirian, kooperatibak ongietorria egin dio buruzagi berriari: "Irizartik arrakasta profesional handiena opa diogu, eta abiatutako sendotasun eta hazkunde ibilbideari jarraipena ematea espero dugu. Alboan izango ditu bezeroekin, gizartearekin eta gainerako kolaboratzaileekin konprometitutako lantaldeak".
Sterlingek Jose Manuel Orcasitasen postua hartuko du. Orcasitasek 26 urte egin ditu Irizarren, eta, horietatik azken hamarrak, lemazain lanetan. Haren zuzendaritzapean hedapen handia izan du Ormaizteko kooperatibak. Gaur egun, hamahiru lantegi ditu; Euskal Herrikoez gain, 3.350 langileko taldea du Marokon, Brasilen, Mexikon eta Hego Afrikan. 2018an, 750 milioi euroko fakturazioa osatu zuen.
