Atzo Mario Draghi EBZ Europako Banku Zentraleko presidenteak zioen herrialdeek EFSF eta ESM erreskate tresnak baliatu behar dituztela zorra erosteko, eta gaur Mariano Raxoi Espainiako gobernuburuak adierazi du ez duela baztertzen EFSF erreskate funtsera jotzea. Hala ere, azaldu du gobernuak oraindik ez daukala erabakirik hartuta.
"Espainiarren interes orokorrari komeni zaiona egingo dut", esan du Raxoik bere agintaldiaren lehen hilabeteen balantzea egitean. Iazko abenduaren 20an presidente kargua hartu zuenetik lehen aldia izan da Ministroen Kontseiluaren bileraren ostean hedabideen aurrean hitz egin duena.
Erreskate funtsera jo aurretik, baina, esan du Draghik iragarritako neurriak ezagutu nahi dituela, "zer esan nahi duten neurri horiek, zer lortu nahi duten, eta egokiak diren. Informazio horrekin, erabaki bat edo bestea hartuko da". Aitortu du atzotik ez duela harekin hitz egin, eta zernahi dela "informaziorik onena" gura duela. "Jakin beharra dugu zertaz ari garen hizketan".
Bitartean, ordea, murrizketekin segituko du Raxoik, eta 2014ra artean 102.149 milioi eurokoak egin nahi ditu.
EBZko presidenteak aurreko hilaren amaieran iragarri zuen euroari eusteko beharrezko guztia egingo dutela, baina Frankfurteko atzoko batzarrean, behintzat, herrialdeen zorra zorraren bigarren mailako merkatuetan ez erostea erabaki du EBZk. Raxoik Europako bankuaren funtzioa defenditu du gaurko agerraldian.
Pedro Azpiazu EAJko diputatuak esan du Espainiak "uste baino lehenago" eskatu beharko duela erreskatea.
