300 megawatt argindar sortzeko gai izango diren 150 haize errota egin eta mantentzeko kontratua lortu du Siemens Gamesa Renewable Energy konpainiak. Barne Mongoliako Eskualde Autonomoan dagoen Xilinhot parke eolikoan instalatuko ditu haize errotak, eta 2018. urte amaierarako haiek lanean izatea aurreikusten da. Gauzak horrela, energia eolikoan aitzindari izaten ari den herrialdean, Txinan, presentzia sendotzen ari da Siemens Gamesa. Dagoeneko 4.600 MW instalatu ditu Txinan.
Albiste on bat ez zaio gaizki etorriko konpainiari, udako hilabeteak amesgaiztoa izan dira harentzat eta. Uste baino emaitza kaskarragoak iragarri ostean, burtsan amildu egin dira Siemens Gamesaren akzioak, eta hilabete eta erdian 4.000 milioi euroko balioa galdu dute.
