Irabazirik gabe itxi du Siemens Gamesak bere lehenengo seihileko fiskala, joan den urritik aurtengo martxora bitartekoa, konpainiak azaldu duenez. Alabaina, energia eolikoaren multinazionalak ez du eskaini iazko emaitzekiko konparaziorik, eta esan du jarduera finantzario-ekonomikoa bat etorri dela "merkatuei 2018rako iragarritako ardatzekin".
CNMV merkatu arautzaileari igorri dion informazioaren arabera, Siemens Gamesak 4.369 milioi euroko salmentak izan ditu lehen seihilekoan, 2017ko aldi berean baino %26 gutxiago. Halaber, esplotazio emaitza gordina (EBIT) 88 milioi eurokoa izan da, iazko aldi berekoa baino %85 murritzagoa.
Bigarren hiruhilekoan, urtarriletik martxora, 35 milioi euroko irabazia lortu zuen konpainiak, lehenengo hiruhilekoan (urritik abendura) izandako 35 milioi euroko galera berdintzeko balio izan diona. Guztira, 112 milioi eurokoa da enpresaren zor garbia.
Edonola ere, oharrean azaldu du jarduera komertziala indartu egin dela urtarriletik martxora bitartean. 22.041 milioi euroko eskariak zeuzkan martxo amaieran: ia erdia (%47,7) zerbitzuei dagokie; %32,2 offshore eskariei (itsasoko haize errotak); eta %20 onshore eskariei (lurreko haize errotei).
Hazkundea, epe laburrera
Alemaniako multinazionalak joan den otsailean iragarri zuen "hazkunde errentagarriaren aroan" sartuko dela epe laburrean, eta horretarako gerrikoa estutuko du, datozen hiru urteetan 2.000 milioi euro aurreztuta.
Diru aurrezpen horren %65 hornitzaileei egindako erosketetatik etorriko dira; %15-20 inguru produkzio kostuetatik; eta gainontzekoa kostu orokorretatik, tartean langile kostutik.
CNMVri igorritako oharrean, azaldu du 2020ra bitartean digitu bakarreko hazkundea izango duela lurreko haize erroten merkatuan, eta bi digitukoa itsasoko haize errotenean.
