Ostiralero Lanbideren bulegoetan elkarretaratzeak eta maiatzaren 10ean greba eguna. Lanbideko beharginek mobilizazioei ekin diete ez daudelako ados "aldebakartasunez inposatu" nahi dieten arreta eredu berriarekin. ELA, LAB, CCOO eta UGT sindikatuak dira deitzaileak eta adierazi dutenez, protesta ekimenek joan den astean egindako langile batzar zabalen babesa dute.
Sindikatuek arreta eredu berri horren ezarpena geldiarazteko eskatu dute "eta eredu berri bat negoziatzeko hasieratik". Ezarri nahi den eredu berriak Lanbideren "zerbitzua okertuko" duela uste dute baita langileen baldintzak ere, besteak beste, langile horien oinarrizko eskubideak urratuko dituelako. Lanbideko bulegoetan mailaka ezartzen ari den sistema berriak, esaterako, euren buruak hatz-marka bidez identifikatzera behartzen ditu langile eta zerbitzuaren erabiltzaile oro.
Lanbidek bete behar dituen eginkizunekin bat etorriko den eredu berri bat nahi dute sindikatuek, enplegu politika aktiboak alde batera utzi gabe. "Zenbait hilabetetan elkarrizketak izan arren, eredu berriaren ezarpena aurrera doa, tamalez, ez baitituzte kontuan hartu gure eskariak". Sindikatuen arabera, Jaurlaritzak adierazi die ez duela eredu berria gelditzeko asmorik. "Abiaraziko dute langile gehienen iritziaren aurka, sindikatu bakar baten sostengurik gabe, eta herritarrentzako zerbitzuaren kaltetan".
