Txaparroaz harago

Biluzik ikusi dute inbertsiogileek euren burua azken urteetan hainbat bider. Edo Zarautzen bainujantzia izendatzeko erabiltzen den txaparro hutsean; izen bereko herri aldizkariaren kasuan lez, laguntza publikoen menpeko. Baina txaparrotan edo biluzik dauden egitasmoez gain, badira AIGre kasuan lez, pixkanaka galdutako arropak berreskuratzen ari direnak: Asiako filiala Prudentiali salduta, likideziaren itsasgoraz harago bizitza badela frogatu da; eta AEBetako manufakturen hazkundeak eta kontsumitzaileen konfiantza lagun, Wall Streeten bagak hondarretako zenbaki gorriak ezabatu ditu. 1.685 milioiren salerosketa pasatu da malekoitik eta, azken portuan, %0,98ko igoera plazaratu du Ibex-35 indizeak. Plazako musikan txerritxo txikienak gozatu dira gehien, %2na pasako igoerak izan baitituzte Inditex, Sacyr, Acciona edota ACSk. Bi erraldoiak aldiz, Santander eta Edurnezuri, %1na pasa igo ziren. Indizea ez biluzteko moduko txaparroa.



Espainiako Altxorraren eta Alemaniakoaren hamar urterako zorrak errentagarritasun ezberdina du, noski. %0,7ko aldea zuten atzo (%3,82koa Espainiakoak eta %3,12 Alemaniakoak), azkenaldiko alde txikiena. Konfiantzaren marea gora ote doa?



Gamesak (-%2,63) egurra jaso du azken egunotan. 9,14 euroan da akzioa, irailean 16 euroz goiti ibili ostean. Altsasuko lantegia ixteko erabakiak adierazten du zalantzak badirela bere Europako jardueraz eta, hortaz, etekinez.