Europako Parlamentuan gaur arratsaldeko osoko bilkuran YPFren auziaz eztabaidatuko dute. Europako Alderdi Popularreko Joseph Daulek eskatuta hartu dute erabakia, Cristina Fernandez Argentinako presidenteak YPF petrolio konpainiaren %51 desjabetuko zuela iragarri ondoren.
Europako Batasunetik kanpoko Europako inbertsioen segurtasun juridikoagatik izenburua eman diote eztabaidari.
Europako Parlamentuko alderdi politikoak Europako inbertsioen aldeko ebazpen bat prestatzen ari dira. Dagoeneko hasi dira argitara emango duten testuaz hitz egiten, eta ostiralean bozkatuko dute.
Ebazpen horretan, Parlamentuak ohartaraziko du YPFren desjabetzeak ondorioak izango dituela Argentinak Europako Batasunarekin dituen harremanetan, baita Mercosur-ekin zabalik duen negoziazioetan ere.
Parlamentuak Europako Batzordeari eskatuko dio auzia G-20 taldearen aurrera eramateko, baita Munduko merkataritza erakundearen aurrera ere.
Repsolek gutxienez 8.000 milioi exijitu zizkion atzo Argentinako Gobernuari, baina Axel Kicillof Ekonomia ministrorde eta konpainiaren administratzaile berriak ziurtzat jo zuen 8.000 milioi baino gutxiago izango direla.
