Zazpi eskaera zehatz alderdi politikoentzat

Euskal Herriko Eskubide Sozialen Gutunak zazpi eskaera zehatz bidali dizkie uztailaren 12an Eusko Legebiltzarrerako hauteskundeetara aurkeztu diren alderdi guztiei. Aurrenekoa zerga erreforma egitea da, krisia kapitalak ordaindu dezan. Zerbitzu publikoak garatzeko ere eskatu diete, batetik azpikontratak publiko bihurtuz, eta bestetik doako zaintza publikoko sistema unibertsal bat sortuz. 1.080 euroko gutxieneko pentsioa eta 1.200 euroko gutxieneko soldata legez ezartzea nahi dute, eta asko jota 35 orduko lan astea. Pertsona guztiak erregularizatzeko ere eskatu diete alderdiei, etxebizitza eskubidea ziurtatzea, eta diru sarrerak bermatzeko errentaren zenbatekoa lanbidearteko gutxieneko soldatarekin parekatzea.