Gonzalezek adierazi duenez, Ogasunaren historian inoiz ez da lortu horrenbeste iruzur harrapatzea. Iaz, esaterako, aurten baino 153,8 milioi gutxiago atzeman ziren. Orain, ordaindu ez den kopuru horren %75 berreskuratzeko itxaropena du Foru Aldundiak.
337,5 milioi horietatik 179,8 milioi, erdia baino gehiago, sozietate zergan egindako iruzurrak dira; 98,7 milioi balio erantsiaren zergan egindakoak; 49,1 milioi pertsona fisikoen errentaren gaineko zergan eta ondare zergan; eta gainerako 8,1 milioiak beste mota batzuetako iruzurrak izan dira.
Gonzalezen azaldu duenez, iruzur gehienak enpresen sorreran, fusioetan eta eskualdatzeetan izan dira. Halaber, enpresek egindako salerosketetan ere diru asko ez dela aitortu esan du. Harrapatu dutenen artean, iruzurrik handiena 60 milioi eurokoa izan dela esan du. Izenik eman ez badu ere, etxegintzako enpresa batek egin duela zehaztu du.
Aurrerantzean, bide beretik
Gonzalezek azaldu du lan taldea handitu izanari esker ohartu direla hainbeste iruzurrez, eta sistema informatikoak eta teknologiak hobetu izanak ere lagundu duela gaineratu du. Hala, aurrerantzean ere zerga ordaintzaileen arau-hausteen aurka borrokan jarraituko dutela esan du. Besteak beste, iruzurrari aurre egiteko neurri gehiago jarriko dituztela indarrean iragarri du. Esate baterako, notarioekin informazioa trukatu ahal izateko hitzarmen bat sinatuko dute «diru zuritzeak» saihestu ahal izateko. Horrez gain, herritarrengan pentsatuta, informazio eta sentsibilizazio kanpaina bat egingo dute.
Aurtengo emaitzei esker zerga ordaintzaileek aurrerantzean «delitu fiskal» gutxiago egingo dituztela uste du Gonzalezek, eta bidenabar, herritarrek Ogasunan konfiantza handiagoa izango dutela.
