Zezen larrutua

2008ko urrira jo behar da Ibex-35ean (-%5,94) atzokoa baino galera handiagoak ikusteko; Lehmanek hondoa jo osteko giro nahasian %9 galdu zuen SIBEko indize nagusiak. Atzo, Espainiako zezena idia ez ote den zalantzak izan ziren; krisia, susmoak, ez dira finantza sistema osoaren ingurukoak, duela hamalau hilabete bezala; eurogunearen periferiaren gainekoak baizik: Grezia, Portugal eta Espainia, alegia. Santander (-%9,4) eta BBVArenak (-%7,54) 228 eta 88 puntu kendu zizkion indize nagusiari hurrenez hurren. %6na pasa galdu zuten banku, eraikuntza nahiz zerbitzu enpresen zerrenda ez da nolanahikoa: Acciona, Sabadell, Abertis, FCC, Mapfre, Banesto, Gamesa eta Popularrek korrida latza bizi izan zuten. Salerosketa Vista Alegre mukuru betetzeko modukoa izen zen: 5.159 milioirena ohiko merkatuan. Defizita, debaluatu ezina, langabezia, defizita, debaluatu ezina... zezen-plaza baino sorgin gurpil borobilagoa da. Alerta gorria (eta horia).



Santander. Galanta da 8.943 milioiren mozkinak izan eta, hala ere, burtsan balioaren %9 pasa galtzea; Santander erraldoiari gertatu zitzaion atzo. Ez bere berankortasunagatik, Espainiaren inguruko konfiantza galera orokorragatik baizik; herrialde horretako Altxorrak hiru urterako zorra jaulkitzean Alemaniak baino %1 gehiago ordaindu beharra du. Azken enkantean baino %0,5 gehiago alegia. Merke zorpetzeko garaiak pasa zitzaizkion Zapaterori. Ondorioz, orain arte gerrikoa estutzea berak esaten zuen lez, orain atzerriko inbertsiogileek agindu diote. Eta bai majo estutu ere.