Juan Carlos Alduntzin Gipuzkoako Ingurumeneko eta Lurralde Antolaketako diputatuak gaur arratsaldean zehaztu nahi duenez, Bilduk eta EAJk Gipuzkoako 2012ko aurrekontuak aurrera ateratzeko lortutako akordioaren arabera, Zubietako errauste planta eraikitzeko enpresekin dagoen hitzarmena urte erdi batez etengo dute.
Sei hilabete horietan, udalen, mankomunitateen eta bestelakoen "eskumenak errespetatuz", Gipuzkoan "zaborren bilketa orekatua eta integrala" lortzeko asmoz gogoeta bultzatuko dute, Alduntzinek esan duenez.
Bilduk eta EAJk atzo arratsaldean itxi zuten aurrekontuen akordioa, eta gaur Batzar Nagusietan osoko zuzenketak bozkatzeko saioan EAJk atzera bota du haren aurrekontuari aurkeztutako osoko zuzenketa. Aurrekontuak abenduaren 23an bozkatuko dituzte.
Markel Olano EAJko bozeramaileak esan du "gustura" daudela eurak, "Gipuzkoari ekarpena" egin diotelako. Haren arabera, Bilduk datozen sei hilabeteetan ez du oztopatuko orain arte aurreikusi eta onartu diren azpiegiturak.
Martin Garitano ahaldun nagusia ere kontent agertu da, eta beste eragileei "une zail hauetan arduraz" jokatzeko eskatu die.
Rafaela Romero PSE-EEko eledunak kritikatu egin du akordioa, eta Garitano eta Olano jo ditu "Gipuzkoa gelditzearen" erantzule gisa. Juan Carlos Canok (PP) EAJri galdetu dio zertara ari den jokatzen hondakinen arloan.
