Ezustekoa gertatu zen ostegunean Galarretan eta ez Ansa II.ak eta Barrenetxea IV.ak irabazi zieteleako partidua Uterga eta Azpirozi, baizik eta emaitzarengatik. 25-40 hartu zituzten mendean gorriak eta beraz puntua galduarazi zieten sailkapenean.
Horren ondorioz bi bikoteek hamaikana puntu batu dituzte ligaxkaren sailkapenean jardunaldi baten faltan. Puntu sorta horrekin arazorik ez lukete behar sailkatzeko ez batak eta ez besteak, baina oraindik dena erabakitzeke dago.
Partiduak bi zati desberdin eduki zituen. lehenengoa berdindua eta bigarrena urdinak jaun eta jabe izan zirena. 13-10 joan ziren aureneko partean, baina hortik aurrera gorriak desagertu eta urdinak 40ra abiatu ziren ziztu bizian. 2 eta 15eko partzialarekin 15-25 aldegin zuten markagailuan. Abantaila handituz joan zen eta 25-36an gorrian punturik ez zutela galduko zirudien arren, azken lau tantoak erreskadan egin eta 25-40 gailendu ziren Ansa eta Barrenetxea.
Urnietako aurrelariak partidu bikaina jokatu zuen eta 21 tantorekin erremontistarik hoberena izan zen. Barrenetxeak ezin hobeto lagundu zuen eta gorrietan Utergak orain arteko partidurik kaxkarrena jokatu zuen. Azpirozek ezer gutxi egin ahal izan zuen aurkariaren indarraren aurrean.
Bihar amaituko da laugarren jardunaldia
Ligaxka azken jardunaldiaren faltan geratuko da biharko bi norgehiagokak jokatu eta gero. Lehenengoan Urriza eta Larrañaga ariko dira Juanenea eta Endikaren kontra, bigarrengoan Ezkurra II eta Etxeberria III lehiatuko dira Matxin III eta Ionen aurka.
Urdinek zazpina puntu dituzte eta irabazi ezkero hamaikana lau bikote egongo lirateke berdinduta. Hala ere hori ikusteko dago. Gorriek irabazi beharra dute kanporatua izatetik oso gertu geratu nahi ez baldin badute. Urriza eta Larrañagak sei puntu dituzte eta Ezkurra II eta Etxeberriak lau. Esan lau bikoteek partida bana irabzi dutela oraingoz txapelketan eta desberdintasuna galdutako partiduetan bildu dituzten puntuak dira.
