Goikoetxeak eta Aizpuruk ez dute jakin beraien partida bikaina bukatzen

Ezkurra II.ak eta Zubirik (Larre-Gain) tanto bakarraren aldearekin irabazi zieten Goikoetxea V.ari eta Aizpuru III.ari (Gurutzeta); 30-37 irabazten ari ziren urdinak, baina ez zuten asmatu partida ixten. Sagardoaren Txapelketako orain arteko partidarik parekatuena izan da. Dirua argi atera zen gorrien alde, 100-40ra, baina urdinek partida ederra egin zuten, eta ezustekoa emateko zorian egon ziren. Goikoetxearen eta Aizpururen lan handiak kolokan jarri zuen gorrien garaipena. Partida polita izan zen, oso ondo jokatutakoa eta markagailuak eragindako emozioarekin. Lau pilotarien zenbakiak antzekoak izan ziren, eta horrek argi uzten du berdintasuna egon zela.
Partida parekatua hasi zen 14nako berdinketa arte. Gorriek luze erreskadan tanto batzuk egin eta 23-15 aurreratu ziren Ezkurra II.a eta Zubiri. Agintzen jarraitu zuten, baina 24-20tik 27na berdindu zuten urdinek, eta 30-37ra aurretik pasatu ziren. Goikoetxea Ezkurra baino hobeto ari zen, eta, atzean, Aizpuru ere Zubiri menderatzen ari zen.
Gorriek ez zuten amore eman, eta 8-0ko partzialarekin aurrea berreskuratu zuten. Hortik aurrera, 38 eta 39ko berdinketak eta azken tanto eder batek lau puntuak ematen zizkion Larre-Gaini eta bitan uzten zuen Gurutzeta.
Ezkurrak ez zuen espero bezalako alderik atera aurrean, eta Goikoetxeak antzeko zenbakiak lortu zituen. Aurrelari gorriak 18 tanto eta 5 huts egin zituen 14 eta 4 aurrelari urdinak. Berdintasun hori atzean mantendu zen, non Zubirik 8 tanto egin zituen sakez, sei piloteoan, sake falta bat eta huts bat piloteoan. Aizpuruk zazpi tanto egin zituen sakearekin, hamar piloteoan, sakean falta bat egin zuen, eta hiru piloteoan.