Aurreko legegintzaldian aurrera egiteko denborarik gabe geratuta, Can auzia ikertu nahi dute, ardura politikoak argitzeko asmotan. Tramitera onartu dute ostegunean Nafarroako Gobernuko lau alderdiek eta PSNk egindako eskaera. Litekeena da Aste Santuko oporren ostean hastea eztabaida.
Geroa Bairen bozeramaile Koldo Martinezek azpimarratu du ez dela posible Nafarroako Kutxa horrela desagertzea, eta, zentzu horretan, garrantzitsua dela gaia ikertzea: "Nafarrok gehien batzen gintuen sinbolo eta errealitate bat izanik, ez da posible besterik gabe desagertzea, erantzukizun politikorik gabe". Ildo berekoak izan dira ikerketa batzordea abiatzeko eskaera egin duten alderdietako bozeramaileen adierazpenak.
UPN eta PPNk aurkako botoa eman dute: horien ustez, ikerketa batzordea abiatu nahi dute gobernuko lau alderdiek euren egungo kudeaketa "ezkutatzeko". "Ez dut uste ezer garrantzitsurik ekarriko duenik: ikerketa batzordea abiatu aurretik idatzita egongo dira ondorioak", esan du UPNko bozeramaile Javier Esparzak.
