Kazetaritza Saria eta Komunikazio Saria banatuko ditu aurten ere Rikardo Arregi Kazetaritza Sariak. Andoaingo Udalak Eusko Jaurlaritzarekin elkarlanean antolatu ohi duen sariketaren deialdia egin du. 'Martin Ugalde gogoan' goiburupean egingo da aurtengo sariketa.
Deialdiaren berri emateko agerraldia egin dute Donostian, Eusko Jaurlaritzaren egoitzan, Estibalitz Alkorta Eusko Jaurlaritzako Euskara sustatzeko zuzendariak, Alexander Huitzi Alfonso, Andoaingo Udaleko Euskara zinegotzi eta alkateordeak, eta Patxi Baztarrika Andoaingo euskara teknikariak.
XXXIII. edizioa da aurtengoa. Duela bi urtetik hona indarrean jarritako berrikuntzei jarraipena emanez, kazetaritza saria eta komunikazio saria banatuko dira. Gainera, finalistak ere izendatuko dira, Kazetaritza sarirako lau eta Komunikazio sarirako beste lau, gehienez. Sarituak izateko hautagaitzak proposatzeko aukera izango du edonork, norberak bere burua edo nornahik beste norbaiten aldeko proposamena egin ahal izango du, baina finalistak nahiz saridunak erabakitzeko ez da nahitaezko baldintza izango aldez aurretik hautagaitza aurkeztea.
