Jose Migel Etxeberria Alvarez Naparra (Iruñea, 1958) 1980ko ekainaren 11n desagertu zen, Ziburun (Lapurdi). Komando Autonomoetako kidea zen, eta 1978tik zegoen errefuxiatuta Iparraldean. Geroztik ez dago haren arrastorik.
Naparra. Kasu irekia (Elkar) liburua argitaratu zuen iaz Jon Alonso idazleak. Naparraren ibilbidea aztertu du Alonsok, haren desagertzearen inguruko hipotesiak, eta ekintzailearen gorpuzkiak topatzeko egin diren saioak. Espainiako eta Frantziako Poliziak eta justiziak desagerpena argitzeko egin dutena –eta egin ez dutena– aztertu du. Konpondu gabeko kasuaren eta horren aurrean etsi ez duen familia bat dagoela kontatu du.
Izan ere, Naparraren senide bat eduki du Alonsok aldamenean gaurko foroan: Eneko Etxeberria, ekintzailearen anaia. Elixabete Garmendia kazetariak gidatu du eztabaida.
