42. Alderdi Eguna ospatuko dute EAJko kideek igandean, eta, urtero bezala, Andoni Ortuzar EBBko buruaren eta Iñigo Urkullu Jaurlaritzako lehendakariaren hitzaldiak izango dira. Aurten, David Bonvehi PDeCateko lehendakaria izango dute gonbidatu nagusia. Izan ere, gaurko agerraldian esan dutenez, bereziki gogoan izango dituzte Kataluniako politikari batzuk, "preso edo atzerrian daudenak aurten ezingo direlako etorri". Galiziako, Balearretako, Valentziako, Kanarietako, Flandesko, Txileko, Georgiako eta Venezuelako gonbidatuak ere izango dira.
Mireia Zarate EBBko idazkariak egin du aurkezpena, gaur, Sabin Etxean. Azaldu du Prest goiburua jarri diotela aurtengo egunari. EAJk Jaurlaritzan, diputazioetan eta udaletan egindako kudeaketa ekonomikoa eta soziala goraipatu ditu, eta azpimarratu du prest daudela "herritarren konfiantza berresteko". Horixe egin nahi dute datorren maiatzean egingo diren udal eta lurralde hauteskundeetan. Hori bakarrik ez; esan du prest daudela datozen hilabeteetan "euskal nazioaren existentziaren baieztapenean urrats handiak" egiteko ere, "gure estatutuen 1. artikuluak dioen bezala".
Mezarekin hasi, eta disko festarekin amaitu
10:00etan hasiko dira ekitaldiak Forondan, mezarekin. 11:15ean hasiko dira agintariak iristen, eta 12:00etan egingo dute ekitaldi nagusia. 13:15ean herri kirolak izango dira, eta erromeria ere bai. 16:00etan hasiko da disko festa, eta umeentzako txoko berezia ere jarriko dute.
Egun osoko festarako, 29 txosna jarriko dituzte, eta 140 jangela. 20.000 bazkari ematea aurreikusten dute.
