15 urteko neskato bat «oso larri» dago, meningitisak jota

Nafarroako Osasun Departamentuak jakitera eman duenez, 15 urteko neskato bat «oso larri» dago Nafarroako Ospitalean, meningitisak jota.

Neskatoa Baztangoa da, eta larunbatean ospitaleratu zuten, ustez meningitisa zuelakoan. Medikuek igandean baieztatu zuten diagnostikoa, eta lerro hauek idazterakoan ZIU Zainketa Intentsiboetako Unitatean zegoen «oso larri».

Nafarroako Osasun Departamentuak halako egoeretan ohikoa den protokoloa jarri du martxan. Hala, atzo bertan tratamendua eman zieten neskatoaren gertuko senideei eta ikaskideei.

Otsailean emakume bat zendu zen B meningitisak jota, Nafarroan. Haurren artean azken kasua iazko azaroan gertatu zen. Leitzako (Nafarroa) 20 hilabeteko ume txiki bat Nafarroako Ospitalean ospitaleratu zuten, ustez meningitisak jota. Pediatriako Zainketa Intentsiboetako Unitatera eraman zuten; eta, berehala, Nafarroako Gobernuko osasun publikoko teknikariak Leitzara bertaratu ziren, gaixotutako haurraren gurasoei eta haren haurtzaindegiko 36 neska-mutilei nahiz lau zaintzaileei gaixotasuna saihesteko tratamendua jartzeko.