Ekitaldia Irati Goikoetxeak aurkeztu du, eta, besteak beste, Berriozargo abesbatzak eta Maite Mene kantariak hartu dute parte. Horrez gain, lore eskaintza bat egin dute fusilatutakoen omenez; zehazki, Iruñeko 308 horien alde, eta, oro har, Nafarroan 36ko gerran fusilatutako 3.450 lagunen alde.
Ekimena iragartzeko aurkezpenean, Joseba Ezeolaza elkarteko ordezkariak nabarmendu zuen "sendotutako" ekitaldia dela larunbatekoa; haren iritziz, horrek esan nahi du "oroimen historikoarekiko lan ona" dagoela atzean eta "pixkanaka gauzak aldatzen" ari direla.
Memoria historikoaren alde apustu egitearen garrantzia azpimarratu zuen, eta erantsi 2015ean jokoan dagoela "iraganera eta injustiziara begiratzen jarraitu edo behin betiko iragan horri bizkar eman eta memoria demokratiko bat eraiki".