Sare Antifaxistak igandean jakinarazi zuen eraso egin diotela 1936ko gerran hildako gudarien eta milizianoen omenez Bilboko Artxanda mendian jarritako eskulturari. Falange hitza eta haren ikurra marraztu dituzte monumentuan.
Iñigo Urkullu Jaurlaritzako lehendakariak azaldu du eskulturaren xedea "gerraren eta diktadura frankistaren basakeria jasan zuten pertsona guztiak oroitzea" dela, gaitzetsi egin du erasoa, "demokrazia eta askatasunaren kontrako erasoa izan delako". Juan Mari Aburto Bilboko alkateak ere kritikatu du ekintza, eta esan du "faxistak soberan" daudela Bilbon.
Sare Antifaxistak gogorarazi du abuztuan zehar beste "eraso eta ekintza faxista" batzuk gertatu direla Galdakaon, Basaurin eta Santutxun.
