Hiru urteko eztabaida eta negoziazioen ostean, akordioa lortu dute Europako Batasuneko erakundeek hiri hondakinen kudeaketaren helburu berriei dagokienez. Hau da, helmuga gisa jarritako ekonomia zirkularrera iristeko, zein helburu eta urrats egin behar dituzten estatuek aurrerantzean. Hain zuzen ere, estatuek hondakinen %55 birziklatu beharko dute 2025erako, %60 2030erako eta %65 2035erako. Aldi berean, zabortegira hondakinen %10 bakarrik eraman ahal izango dute 2035erako.
Europako Ingurumen Bulegoak (EEB) "tamalgarritzat" jo du estatuen jarrera, Europako Parlamentuaren hasierako helburuak apaldu egin dituelako. Ildo horretan, arrisku batez ere ohartarazi du: zabortegiari jarritako muga dela-eta, eta errausteari oztoporik jartzen ez bazaio, orain arte zabortegiak erabili dituzten herrialdeek hondakinen errausteari ekitea aurrerantzean. EEB 30 herrialde baino gehiagotako ingurumen erakundeak biltzen dituen sarea da.
Piotr Barczak EEBko eledunak adierazi du gehiago espero zitekeela prozesu honetatik, baina, hala ere, "aurrerapauso garrantzitsutzat" jo du legedi berria, orain arte indarrean dagoenarekin alderatuta. "Pozik gaude eztabaidak amaitu direlako. Orain erakundeek aukera hau baliatu behar dute ekonomia zirkular baterako trantsazio baterako", adierazi du.
Lege berria 2018aren hasieran jarriko da indarrean eta estatukideek 24 hilabete izango dituzte euren legedietara eramateko. Gaur egun hondakinen heren bat inguru bakarrik birziklatzen dira Euskal Herrian.
