24 urteko gizon bat atxilotu dute, bikotekideari eta umeari mehatxu egin dielakoan

Urtea hasi zenetik etengabe izan dira halako albisteak: asteburuan beste sei gizon atxilotu ditu Ertzaintzak Bizkaian eta Gipuzkoan, emakumeei eraso dietelakoan. Urtea hasi zenetik, ia 40 gizon atxilotu dituzte hiru herrialdeetan; gainera, gazteak dira gehienak. Adibiderako, Barakaldon (Bizkaia) asteburuan gertatutakoa: 24 urteko gizon bat atxilotu zuten, labana batekin bikotekideari eta hilabete gutxiko umeari mehatxu egin zielakoan. Andreak salatu du festa batetik etorri eta gero eztabaidan hasi zirela eta gizonak eraso egin nahi izan ziola. Aurrekariak ditu gizonak.

Sestaon (Bizkaia), 34 urteko gizon bat atxilotu zuten igande goizaldean, kuxin batekin bikotekidea itotzen ahalegindu zelakoan. Donostian, berriz, 33 urteko gizon bat atzeman zuten larunbatean, bikotekideari tratu txarrak eman dizkiolakoan etenik gabe.

Donostian bertan 40 urteko beste gizon bat atzeman zuten larunbat arratsaldean, bikotekide ohiari eraso egin ziolakoan. Iraindu ere egin zuen, emakumeak salatu duenez. Iurretan (Bizkaia), andre bat erietxera eraman behar izan zuten, ustez bikotekideak eraso egin ostean. 55 urte dauzka gizonak, ustezko erasotzaileak.

Amari eraso zion beste gizon batek Donostian. Poliziak dio 57 urteko gizonak hiru urtean eman dizkiola tratu txarrak amari.