29 urteko gizonezko bat atxilotu dute Eibarren neska bati sexu erasoa egitea egotzita

Neska bati sexu erasoa egitea egotzita 29 urteko gizonezko bat atxilotu zuen Ertzaintzak atzo goizean Eibarren (Gipuzkoa). Jaurlaritzako Herrizaingo Sailak emandako azalpenen arabera, atzo goizeko zazpiak aldera gertatu zen erasoa. Euskotrenen geltokitik etxera bidean zihoan neska, eta gizonezkoa (ezaguna zuen) atzetik segika zuela ohartu zuen. Harekin sexu harremanak izateko proposatzen hasi zitzaion behin eta berriz. Neskak ezetz erantzun zion, eta, gainera, haserrea adierazi zion zeukan jarreragatik.

Hala eta guztiz ere, gizonezkoak indarrez heldu zion eta ukitze lizunak egiten hasi zitzaion. Egoera okertzen ari zela ikusita, garraisika laguntza eske hasi zen neska. Inguruko bizilagun batek entzun eta Ertzaintzari deitu zion. Nolanahi ere, gizonezkoak alde egin eta bere etxean babestea lortu zuen. Etxe barruan atxilotu zuten ertzainek sexu abusua egotzita. Gaur eraman dute epailearengana.