Eusko Jaurlaritzako Osasun sailak jakinarazi duenez, 30 anbulantzia kiskali ditu sute batek Arrigorriagan (Bizkaia), eta beste bost suaren beroak kaltetu ditu. 5:00ak aldera piztu da sua, Atxukarro industrialdean. Orotara, 180 anbulantzia zeuden bertan.
Ertzaintza sutearen jatorria ikertzen ari da, eta ez du baztertzen gertakariek lan gatazka batekin zerikusia izatea. Izan ere, Bizkaiko anbulantzien zerbitzua eskaintzeko esleipena enpresa batetik bestera aldatu den asteburuan gertatu da.
Joan den ostegunean, gurpilak zulatu zizkioten 90 anbulantziari, Bilboko Zorrotza auzoan.
Osasun sailak "sabotajea" izan dela salatu du. Hedabideetara igorri duen ohar baten bidez adierazi duenez, "gisa horretako gertakariek arduragabekeria sakona adierazten dute eta euskal gizarteak onartu ezin dituen gizalegearen kontrako eta etikarik gabeko ekintzak dira".
