43 hildako. Bost desagertu. Kalte material izugarriak; 200.000 milioi pezeta ingurukoak. Txikizioa. Ondoren, elkartasun uholdea. 30 urte bete dira gaur uholdeek Euskal Herri osoa harrapatu zutela. Hiri eta herri ugaritan izan zuen eragina hondamendi natural handienak.
Gipuzkoatik, Nafarroa iparraldetik eta Ipar Euskal Herritik igaro zen euritea aurrena. Hilaren 25eko ostegun gauez hasi zuen euria, eta 150 litro inguru bota zituen metro koadroko. Gipuzkoan, gainezka egin zuten ibaiek, eta kalte materialak eragin zituen han-hemenka. Bakartuta geratu zen herrialdea, komunikazioak etenda. Hildakorik ez zen izan, ordea.
Araba eta Bizkaitik igaro zen frontea hilaren 26an, eta han okerrera egin zuen egoerak. Ibaizabal eta Nerbioi ibaiek ezin izan zuten hartu 24 ordutan botatako euria —503 litro egin zituen metro koadroko—, eta Nerbioi ibaiak gainezka egin zuen Laudiotik (Araba) Santurtzi eta Getxoraino (Bizkaia).
Bilbon, Bermeon eta Laudion eragin zuen kalte eta oinaze gehien uholdeak. Bost lagun hil ziren Laudion. Bilbon, alde zaharrean, bost metroko altuera hartu zuten urek. Aste Nagusia ari ziren ospatzen Bizkaiko hiriburuan.
Irudi gordinak utzi zituen hondamendiak, baina baita elkartasunekoak ere. 5.000 pertsona aritu ziren boluntario lokatza eta hondakinak kentzeko lanetan.
Bermeon, urteurrena gogoan
Bermeoko Udalak ekitaldi bat antolatu du gaur arratsalderako, uholdeen 30. urteurrena oroitzeko. 19:30ean, 1983ko uholdeen argazkiekin erakusketa bat osatuko dute. Kalte handiak eragin zituen urak bertan, eta, besteak beste, herriko kasinoa bota zuen. Gainezka egin zuen Artika ibaiak, eta herriko saltoki eta fabriketan kalte handiak sortu zituen.
Ekitaldian, ikusgai izango da Jabi Elortegi zine zuzendariak uholdeen harira egindako dokumentalaren aurrerapen bat. Hitzaldi bat egingo dute, baita ere. Udalak gonbitea egin die herritar guztiei ekitaldian parte hartzera.
