Ari da forma hartzen Bernat Etxepare lizeo berria. Uztailean abiatu zituzten obrak Baiona iparraldean herriko etxeak utzitako lurretan, eta jadanik hasi dira lurretik eraikinak ateratzen. Obrak finantzatzeko dirua bildua du Seaskak baina gelak antolatu eta materiala erostekoa falta da. “Bulegoak, kadirak, laborategietako materiala… dena eskuratu behar dugu”, adierazi du Jef Mateo Bernat Etxepare lizeoko presidenteak. 300.000 euro falta zaizkie orotara.
Dirua biltzeko, sagarrondoak salduko dituzte, “milaka sagarrando”, herritarrek beraientzat atxikiko dituztenak edo Seaskaren esku utziko dituztenak. Horretarako, Baiona inguruan lur bat lortu nahian ari dira Euskararen Sagardia osatzeko. Bertan, profesional baten esku utziko lituzkete zuhaitzak, harek ekoizpen bat ateratzeko gisan. Herriko etxeekin ere harremanetan dira eta horietako batzuk jadanik engaiatu dira sagarrondo batzuk erosi eta beren herrian euskararen sagardia osatzera.
30, 50, 100 euro edo gehiago ematen ahalko du herritar bakoitzak sagarrondoaren truke; www.betxepare.euswebgunean jarri dituzte salgai. Kanpaina girotzeko, hitzordu kultural andana ere antolatu dute, horien artean bertso afaria Sustrai Colina eta Aimar Karrikarekin abenduaren 29an Baionan, eta Bernat Etxepare lizeoko ikasle ohien gaualdia martxoan. Ekainean, Sagarno Eguna antolatuko dute Baionan.
Etengabeko garapenean
Bernat Etxepare lizeo berria azken urteetan Seaskak izan duen garapenaren lekuko zuzena da, sail teknologiko eta profesionaletara zabaltzeaz gain, laugarren kolegio bat ere irekiko baitute, Baionan, lizeoak orain arte zituen eraikinetan. Baina garapenak Frantziako administrazioaren oztopoak aurkitzen ditu uneoro: aurtengo ikasturtean bigarreneko lau klase irekitzeko behar zituzten postuak ukatu dizkie akademia ikuskaritzak eta sail profesionala irekitzeko ere, ikuskaritza beraren eta Akitania Berria eskualdearen baimena beharko ditu Seaskak. “Negoziaketa gogorrak” iragarri ditu Paxkal Indo Seaskako presidenteak.
Anartean, ikasle kopuruak gora egin ahala, lapurdi kostaldean aurki bosgarren kolegio bat irekitzeko aukera ikusten dute Seaskako arduradunek. “Nork daki, agian hemendik bost urtera lizeo hau ere txiki geldituko zaigu”, adierazi dute.
