Aranzadi Zientzia Elkartearekin eta Nafarroako Gobernuarekin elkarlanean, Akelar eta Sakon espeleologo taldeko kideek 1936ko gerran desagertutako gizonezko baten gorpuzkiak aurkitu dituzte Erroibarren (Nafarroa). Izeurgiko lezean egin dute aurkikuntza, 50 metroko sakoneran. Espeleologo taldeak azaldu duenez, hainbat animalia hondakinekin nahastuta agertu da hezurdura.
Nafarroako Gobernuak ezarritako protokoloari jarraituz, datozen hilabeteetan hasiko dituzte gorpuzkiak ateratzeko lanak.
Bake, Elkarbizitza eta Giza Eskubideetarako Zuzendaritzak laguntza eskatu die herritarrei gerra garaian fusilatu eta desagertutakoen inguruko informazioa lortzeko. "Familia askok 80 urte daramatzate senideak aurkitu zain, eta gaurkoa bezalako aurkikuntzak oso garrantzitsuak dira haientzat".
Omenaldia gaur
Nafarroako Fusilatuen Senideen Elkarteak antolatuta, omenaldia egingo diete gaur 1936an Valcalderan fusilatu zituztenei. Iruñeko kartzela zaharraren lurretan egingo dute ekitaldia, 19:00etan. Hain justu, gaur bete dira 80 urte 52 preso Cadreitara eraman eta fusilatu zituztenetik.
