Aranzadiko teknikariek joan den asteazkenean hasi zituzten bi gorpuak ateratzeko lanak. Memoria berreskuratzen ari diren taldeek jasotako testigantzei esker aurkitu ahal izan dituzte gorpuzkiak. "Pertsona haien lekukotasunei esker, eta memoria taldeek gertatutakoari buruzko datuak biltzen egindako lanaren bitartez, bi pertsonaren gorpuzkiak arukitu ahal izan dira", jakinarazi du Nafarroako Gobernuak.
Gorpuak Ibero herriko Lapurren Zubia deritzonetik gertu aurkitu dituzte. 1936ko kolpe militarrean hildako bi herritarrenak dira.
Bi gorpu horiekin 64 dira legealdi honetan aurkitutakoak. Horietatik hiru Urdanizen, eta beste bat Olabe herritik gertu.
