Txertaketa erritmoa gero eta abiadura handiagoa hartzen ari dela baieztatu du gaur goizean Maria Txibite Nafarroako Gobernuko presidenteak. Gainera, baikor mintzatu da txertaketa egutegia betetzeko epeen inguruan: «Hasierako aurreikuspenak hobetzen ari gara». Eta txertaketa prozesua martxa onean doan seinale da Txibitek iragarri duena: foru gobernuak aurreikusitako dosi kopurua jasotzen badu, 40 eta 49 urte arteko herritarrek ekainaren 15etik aurrera jaso ahal izango dute COVID-19aren aurkako txertoa. Adin tarte horretan dauden herritar kopurua nahiko zabala da: 85.000 herritar inguru dira Nafarroan.
NUP Nafarroako Unibertsitate Publikoaren txertaketa guneari gaur goizean egindako bisitan egin du iragarpena Txibitek. Han azpimarratu du birusaren transmisioaren datuak hobetzen ari direla, eta intzidentzia tasa apalduz doala. Azken astean %40 egin du behera intzidentziak foru erkidegoan, eta, tasa horrek behera egiten duen bitartean, abiadura handiagoa hartzen ari da txertaketa prozesua, Txibitek azpimarratu duenez.
